香港人好鍾意換電話，見到有新機，就身痕換機。Apple、Samsung兩大霸主無在港上市，散戶就炒作概念股，前者有富智康（2038）、瑞聲（2018），後者就炒舜宇（2382）。
比亞迪電子炒唔起
台灣一哥HTC推皇牌機「新HTC One」，仲據聞簽咗《Iron Man》男主角Robert Downey Jr.為全球品牌代言人。作為手機外殼生產商之一的比亞迪電子（285），一度憧憬爆上。
摩通4月尾首予增持，上望6元，5月中又唱好，升目標至6.6元，的確刺激股價由3元炒上至5.19元。雖然比亞迪電子6月隨市急速回吐逾三成，昨收4.07元跌3%，但都算未打回原形。
昨日HTC竟然公佈一個嚇死人消息，料第三季營業利潤率係零，甚至經營虧損8%。該公司去年整體毛利率已跌至8.45%，昨日仲話，毛利率受到新HTC One高成本結構、清存貨影響，希望第四季能走出谷底。
連皇牌出埋，業績都係唔掂，各大行聯手唱淡，摩通、瑞信都叫沽貨，HTC慘到跌停板。
雖然有內地報道指，比亞迪電子搶咗富智康唔少生意。不過，就連風光一時的富智康，都明白做手機代工好難搵食，積極轉型，同美國品牌合作推出電話。無大行撐、HTC概念玩完，毛利低三大打擊，比亞迪電子想再現炒風，難！
瑪姬兒
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24