大家仲記唔記得，狼振英嚿年當選特首後，即刻流晒口水話想2017年競選連任？但佢上任後醜聞不絕，睇怕阿爺都唔敢畀佢再坐一屆咯！查實就算唔搞Plan B，北京都係時候物色2017年特首人選，而喺林鄭呢位熱馬之外，食物及衞生局局長高永文近日忽然行情看漲，成為最新嘅2017年特首黑馬。
「高民望」與泛民有偈傾
高永文憑乜嘢上位，獲阿爺另眼相看？查實都係因為高民望。有最近見過內地中間人嘅政界人士同八方講，中間人講開2017年有乜嘢建制派特首人選嘅時候，主動問起佢覺得民望不俗嘅高永文點呀？做嘢得唔得呀？而呢啲中間人以前嚟嚟去去只係問林鄭之嘛，似乎阿爺已經默默𥄫中係政圈有「高民望」之稱嘅高永文。
有政界中人分析，有狼振英「珠玉在前」，阿爺唔再敢搵同泛民完全冇偈傾嘅人做特首，而高永文向來都同泛民關係良好，睇佢喺早前特首答問大會上「勇救」因為絕食而幾乎暈倒嘅人民力量陳志全就知啦。有局中人話高永文好博㗎，社團活動幾乎逢請必到，唔到先至係新聞，似乎人緣好，都係佢一大優勢喎。
佢噚日去咗澳門拜訪官員，睇埋喺橫琴嘅中醫藥產業園，一向重視中醫發展嘅佢，有唔少中醫fans。
據了解，狼振英僭建醜聞爆出後，中間人一直冇停過收集「可造之材」人名畀阿爺揀吓，希望2017年唔會再揀個爛燈盞。近期政圈亦傳出中大校長沈祖堯都行情看漲，加上從未放棄成為香港首位女特首嘅葉劉淑儀，唔知最後有冇人會跑出呢？
李八方
mailto:[email protected]
【動主播召喚敢你就來】
立即報名： http://anchor.nextmedia.com