噚日個個都等緊美國聯儲局議息結果，所以港股觀望氣氛濃郁，不過唔關個市嘅中細價股就反而表現唔錯，好似早兩周介紹嘅嘉輝化工（582），噚日終於發力，收0.56元，較介紹日開市價0.49元升咗14.3%，由於噚日先破位，有貨可揸住。
今日小弟就揀隻噚日呈異動嘅萬威國際（167）。睇完資料先知，呢隻傳統工業股都係一隻靚殼，原來佢過去一段時間靜靜雞私有化咗兩間子公司，今年初又大手沽咗好多物業，種種迹象顯示，應該有後着。
不過，更關鍵嘅係，佢6月時公佈業績繼續蝕錢，但股價乜事都冇，之後仲反覆向上，昨日更直逼年初高位0.185元。股價表現呢樣嘢冇得呃，正正係話畀你知佢係有嘢搞，佢𠵱家市值5億唔夠，可塑性甚高，趁佢發威不妨跟進。
keep住淨身似要甩殼
萬威包晒設計、開發、製造、市場推廣同分銷一條龍。佢所有嘅產品都配備咗液晶顯示器同微處理器嘅應用，主要可分為三個類別：液晶體顯示電子消費產品、電子教學產品同電訊產品。單睇行業性，如果唔炒殼股概念，其實都可以炒目前大行其道嘅信息消費概念。
講返佢過去一段時間點解靜靜雞私有化啲子公司先。1997年，佢分拆咗液晶體電子消費產品部門，成為一間於新加坡證券交易所掛牌上市嘅獨立公司——IDT Singapore。萬威持股63.59%。不過2010年佢又將IDT Singapore私有化，原因係該上市公司，長期缺乏交投，失去上市的作用。其實早喺2002年9月，佢又提出將旗下持有75%權益嘅新加坡上市公司I-Comm進行全面收購建議。公司當時指出，將I-Comm私有化將可使萬威更有彈性地分配同管理萬威、I-Comm嘅資源。
由於大股東有鋪私有化癮，所以唔排除同樣會將萬威私有化，加上萬威過去幾年嘅交投，確實唔活躍，基本上就發揮唔到上市嘅功能，更加有私有化嘅誘因。不過，目前市場唔興私有化，興甩咗隻殼，原大股東就要返原有業務呢種模式，因為唔使等股東會，同埋又可以賺埋殼價，加上大股東只持57.18%，私有化勝算唔高，所以玩甩殼呢個模式最啱萬威。
事實上，公司keep住進行淨身動作，好似今年初，佢向三名獨立買家，分別出售紅磡凱旋工商中心單位同車位，擸番成4,000萬銀，而上址原為公司辦公室，出售之後又再租回。
呢吓好明顯就係將個財務報表執得簡單啲，方便金蟬脫殼，就算真係唔賣，都唔係壞事，起碼公司多番咁多cash嘛。
總括而言，萬威已經露咗底，短期買入博倍升嘅值博率甚高，跌穿250日線0.127元止蝕。
陳承龍
本欄逢周四刊登
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24