唔知大家仲記唔記得王心慰監製套無綫劇《與敵同行》呢？當年郭晉安做奸人，同鄭嘉穎鬥戲，觀眾都大讚佢兩個演技好，前排王心慰籌備新劇《忠奸人》，好耐冇做奸人嘅安仔再做奸律師，到時會同正義警察吳卓羲鬥法。
女主角就由田蕊妮擔正，阿田做輕喜劇最拿手，搵佢拍呢套戲確係幾有新鮮感，阿田日前講到拍呢個劇，都有啲興奮：「劇中我係個是非不分嘅砵蘭街妹，後尾跟錯大佬坐埋監，出監後去咗安仔嘅律師樓做嘢，我好耐冇拍正經戲喇，呢套劇會係我咁多年嚟最大嘅挑戰，因為內心戲變化好大，其實我都有問監製點解搵我做，佢話相信我會做到囉。」
怕兩邊做唔好
既然監製咁睇好阿田，阿田呢排好努力咁咪劇本嚟應付呢個挑戰，仲話睇劇本都好有《與敵同行》feel。至於實際嘅陣容，仲有商天娥、陳智燊同楊明等。
除咗拍劇外，之前好多人都話希望喺亞視《未來偶像爭霸戰》出身嘅阿田可以參加《星夢傳奇》展身手，但係唔知係咪梁烈唯被out，所以令阿田有啲怕怕呢，佢講到明唔會參加：「哈哈……因為我專注力有問題，只做一個工作，𠵱家就嚟拍劇，我怕兩邊都做得唔好嘛。」
版主：陳基征
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24