恒隆地產（101）主席陳啟宗一直盲撐CY，就算佢民望幾低，佢都話CY係最好嘅，早排又幫人鬧財爺曾俊華係大罪人；CY愛將發展局局長陳茂波最新爆出囤地風波，同姓三分親，陳啟宗照理應該盲撐埋陳茂波啦，點知陳啟宗選擇封嘴喎。
業績會只講公司
恒隆噚日舉行中期業績記者會，傳媒當然最想知道陳啟宗點樣繼續盲撐CY政府，於是係咁問陳啟宗，陳茂波應否下台、係咪CY政府負資產等等，陳啟宗竟然一改乜都講一餐嘅本色，只講公司業務，唔評時事。
對於陳茂波囤地風波，佢話「人人都可以有意見，你有你嘅意見，我有我嘅意見，我講都冇意思，講事實好啲。」簡言之，「我唔係好想畀意見」。哦，即係唔講，實情係咪根本諗唔到點幫陳茂波講好說話呢？陳茂波話自己解釋得論盡，佢可能費事添類添亂。
EQ高冇黑面
至於佢早前無端端鬧鬍鬚曾唔應使則使，係大罪人，令到大眾普遍企喺鬍鬚曾嗰邊，陳啟宗就更加唔想提咁款啦，佢不停提醒大家，呢個係恒隆業績會，題外話唔想講咁多。難得佢心理質素超高，早有準備，基本上全程保持笑容，冇黑面，果然薑係越老越辣。
可惜，首富李嘉誠決定取消長實（001）、和黃（013）中期業績記者會，今日冇得睇超人表演了。
李華華
mailto:[email protected]
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24