多事之周踏入第三天，本欄見報之時，美國第二季GDP數據已揭盅，儲局議息會議亦有結果，下一次會議將會喺9月中舉行，是次議息聲明，將會成為嚟緊個幾月嘅投資主旋律。
另一邊廂，中央政治局召開會議，下半年經濟工作定調為穩增長調結構促改革，反映阿爺依然重視經濟增長，同之前總理李克強保七言論不謀而合。不過，市場焦點明顯放喺政治局會議冇再提及進一步調控內地房地產市場，內房股應聲炒上，上周推介嘅綠城中國（3900），一周有逾7%升幅，有跟進嘅戰友可袋袋平安。大市繼續缺乏方向，原本阿爺定調保七，係挽回股民信心嘅最佳強心針，可惜之後爆出審計署嚴查地方債，令升幅無以為繼。其實市場信心係最重要動力，唐牛相信，要突破現時悶局，必須有重大消息加強或削弱市場信心，先可再次走出大方向。
大市未見突破，最穩陣依然係炒績優股。內地環保龍頭光大國際（257），早前預告中期盈利大升，噚日成功逆流而上，升2.6%。集團將於下周二出業績，戰友可作兩手準備，一係現價衝入博破頂，放榜前贏輸都走人，一係就放榜後等獲利盤湧現時撈貨。
唐牛
【動主播召喚 敢你就來】
立即報名： http://anchor.nextmedia.com