噚日嘉里（683）公佈，擬將物流業務分拆上市。查實自從呢個世界有網購後，相信好多人都感受到物流嘅偉大。菲菲最近經常去韓國版「淘寶」Gmarket，買吓韓國衫呀、護膚品咁，上網一click，幾日就到貨。
家陣物流業個餅大咗，行業前景衰極有限，如果唔係馬雲都唔會再創業，搞個「菜鳥」物流網絡。
再睇埋嘉里上年份年報，物流業務按年增長兩成至193億元，佔集團總收入56%。全年核心盈利超過8億元，按年增長一成。雖然呢8億元，只為集團貢獻17%核心盈利。不過以嘉里於物流界龍頭地位，如果分拆成事，嘉里估值應該會有所提升。
不過由另一角度睇，嘉里於年報入面，亦已講到因整體需求緩滯，令物流業增長放慢。
上年都已經減速，今年就更加唔使講。弔詭嘅係，先有超人賣百佳，後有嘉里拆物流業務。
超市同物流業務，雖然同樣都係毛利低，但佢哋勝在現金流強勁，拎住呢類業務唔係壞事。不過現在和黃（013）同嘉里都將呢類實業減磅，似乎兩間公司對整體經濟前景唔多睇好。
Fifi
本欄逢周二、四刊出
【動主播召喚 敢你就來】
立即報名： http://anchor.nextmedia.com