香港畫家葉芃為港增光，佢最近參加My Art Contest舉辦嘅全球繪畫比賽，以一幅《蘋果》奪冠，獲得500美元（港幣3,875元）獎金。My Art Contest係以美國為基地嘅藝術網站，2007年成立，目的係畀全球畫家一個交流同推廣畫作嘅渠道。
葉芃喺廣東出生，3歲來港，大學時期喺美國留學，修讀藝術。佢好坦白咁話，呢個獎對佢冇乜實質作用，只係一個小小鼓勵。至於《蘋果》呢幅油畫，係喺內地創作嘅一幅寫生作品，佢笑住話可能美國人鍾意蘋果，所以咁欣賞呢幅畫。
喺大陸有間畫室，平時賣畫維生嘅佢慨嘆，喺香港做畫家好困難，因為香港市場太細，佢嘅作品全部要靠畫廊幫手喺海外推銷。葉芃寄望西九文化區落成後，政府加強推廣文化創意產業，開拓香港畫家市場。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange