第二季己過多時，第三季頭一個月亦已完結，相信本欄的忠實讀者不禁要問一句：「為甚麼報告王仍未出季度檢討？是被第二季收水震散，冇面見讀者嗎？」
其實只是近期較忙，到今日終於可公佈。本欄第二季13次叫跟，錄得九勝五負的成績，平均回報為5.23%，相對季內恒指跌6.71%，大幅跑贏大市。自認今季算是成功一季。
估中兩萬點水平見底
今季成功主要有兩個原因，大跌市前斬埋有柴，見底後懂得撈。本欄上述五負，全數來自6月大跌市。事實上，4至5月時，本欄聽到不少基金及散戶，普遍已覺得會出現大跌，只是不知何時，但與其「退市」，不如趁音樂椅完結前炒多兩轉。
4至5月初本欄一如大部份散戶，手風奇順，本欄建議跟的阜豐（546）、新天綠色能源（956）、銀娛（027）、瑞聲科技（2018）都升9%至13%，而當時得令的百勤油服（2178）更坐順風車升逾三成，為之後的跌市留一手。
6月除非不炒股，否則無人能幸免，本欄跟大行推介亦全敗。猶幸本欄預言20000點見底，結果19400點水平見底，雖然有偏差，但其時懂得撈底，見報告乏力自行推介，6月中高明推介安東油田（3337），惟頁岩氣故事已到尾聲，僅升4.4%；月底見有勢，加上煤價跌，再跟華電國際（1071），升幅近一成半。
期內本欄最幸運的是，大致估中20000點水平見底，追回部份損失。報告完畢。
http://www.facebook.com/AppleKoming
高明
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24