香港地道招牌麵家又少一間。係旺角黑布街經營32年嘅龍記麵家，做埋噚日最後一日生意，正式宣佈告別食客。
幾兄弟拍檔經營嘅龍記巷仔麵檔，大哥賴達芳（63歲）同十弟賴義芳（49歲），同樣鍾意玩健身。麵檔四圍貼滿兄弟健碩身材嘅相片，難怪熟客仔又叫龍記麵家做大隻佬麵檔！
想同太太周遊列國
豉油王炸醬撈粉、辣牛根、雲吞麵、豬手同鳳爪，都算係龍記街知巷聞嘅招牌美食。龍記老闆賴達芳話，麵舖嘅招牌食品，係外父傳授嘅廣州風味美食，咁多年嚟雲吞、水餃堅持加韭菜；手打蝦餃一定唔落硼砂。撈麵湯底落足豬骨、大地魚、蝦米。唔怪得食足30年嘅街坊余先生，食完一碗又一碗。
賴達芳話，旺角區同行食肆，唔少因大幅加租，被迫結業。龍記經營32年，租金由2,000蚊加到今日6.3萬。不過龍記決定結業，皆因大哥賴達芳同太太捱咗幾十年，好想周遊列國，享受人生。佢話「後生時，玩爆炸；年紀大，玩養生」。至於胞弟賴義芳，打算休息後，考慮同老友合作，希望將大隻佬麵食承傳落去。
mailto:[email protected]
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24