唔單止同人唔同命，連同隊都唔同命；曼聯、曼城、熱刺等今夏出訪亞洲，又濕又熱之餘，仲要嘆吓香港爛球場；西甲豪門皇家馬德里就精好多，選擇出訪美國，豪嘆比華利山酒店，難怪盛傳連熱刺翼鋒加里夫巴利都心意已決，要加入銀河艦隊大家庭。
皇馬28人大軍周一就飛抵美國洛杉磯，準備一系列國際冠軍盃（見附表），連4位代表西班牙出戰洲際盃嘅國腳包括卡斯拿斯等亦都歸隊。加里夫巴利未加盟，皇馬焦點都仲喺基斯坦奴朗拿度（C朗）度，C朗似乎都仲好沉醉自己個「小學雞」造型，黑色短波褲同黑色長襪，認真搞笑。
豪住比華利山酒店
皇馬粒粒巨星，球會又點會虧待佢地，嚟到洛杉磯，大軍就入住比華利山酒店，貪酒店同練習場地UCLA好近喎；我求大俠上網查一查，比華利山酒店基本房間房租閒閒地都1,000美金一晚（約8,000港元），套房等更加貴，銀河艦隊認真豪氣；而經過10幾個鐘飛行旅程，教練安察洛堤就煙癮大作，整番幾飛煙先上房間。
奧雲勸巴利咪登艦
皇家馬德里求購加里夫巴利就好夠誠意嘞，出到5,100萬鎊加迪馬利亞、法比奧干查奧雙星㖭！加加埋埋，巴利嘅身價有成9,500萬鎊；有報道講，熱刺如果強行留人，已黑面返咗英格蘭嘅巴利仲會搞對抗，英國博彩公司列巴利轉投皇馬賠率得番1.5倍㖭。不過剛退休嘅英格蘭前鋒奧雲，就以前皇馬球員呢個過來人身份警告巴利，話西班牙生活節奏慢，佢當年效力皇馬，屈係酒店5個月，又好掛住家人、朋友、寵物狗等等，仲叫巴利諗清楚可唔可以適應西班牙生活先好過檔喎。
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24