縱橫金融界多年嘅財經怪傑Ｌ突然來電話要請食飯，就到佢嘅飯堂「名人坊」（九如坊一間酒店內），上到去，喼頓已經叫定：「左先生，博士等緊你。」博士？邊位博士呀，竟然就係財經Ｌ，大家相識多年，何須客氣，直問：「你當年在中大讀MBA冇畢業，依家係甚麼博士？」財經Ｌ哈哈一笑，遞上名片，其實佢已退休做閒雲野鶴，只是做吓INED（獨立非執董）過吓日辰啫，佢間公司在長沙灣，但以「名人坊」為飯堂，可知佢幾咁得閒。一睇名片，真係唔得掂，字母銜頭多到數唔晒，包括香港理工大學PhD，澳洲Curtin大學DBA，中大理學碩士，科大碩士，城大碩士，公開大學MBA，還有ACIS，FCCA，CPA等等，一個字母收一萬蚊人工一個月都唔得掂。
於是立即改稱佢做博士Ｌ，以示尊敬，再問佢：「讀埋咁多學位做乜？」博士Ｌ答：「讀開有癮吖嘛，我讀過咁多商業財經學位，理工大學酒店學博士都讀埋，現在仍然繼續讀，讀嘅係西方哲學，洋教授對我講過叔本華，尼采，黑格爾，康德，讀得好辛苦，哲學家思維與商業、經濟專家大大不同，我正在思考尼采嘅『超越昇華』，『上帝已死』，叔本華嘅『人與人之間的相處，相當於狼與狼的關係……』」呢樣真係諗佢唔到，從來一身銅臭，並以此為榮，不怕與他人爭論金錢重要性之財經人物，竟然同左丁山講尼采、叔本華，好彩當年年青時偶有涉獵，不致一無所知，可以同佢講番幾分鐘，笑佢：「你鍾意叔本華講女人與性啫啩？」博士Ｌ話：「叔本華話性係人與人之間嘅核心關係，我好信服呀。但最近洋教授講佔領中環，我起初極為反感，指佢煽動破壞，不過佢由馬丁路德金民權運動，公民抗命講起，講到最收尾，我開始唔抗拒佔中，咪等班民主派佔中，出吓聲，出吓氣囉，政府不須反應過敏，我唔會參加佔中嘅，但依家唔再抗拒！」讀哲學竟有如此魅力，真想唔到，上一位朋友讀埋博士碩士共七、八個學位嘅係已故嘅伍達倫博士，伍博士成個讀書人咁款，所有朋友都信佢真心讀書，視之為興趣。博士Ｌ成個搵銀打仔格，點會信佢係讀書人呀，但佢又的確收集碩士學位如收集郵票咁輕鬆，讀書考試如此有天份，唔到左丁山唔服。講哲學講咗一輪，先至醒起，午飯主題曲係乜？博士L慢條斯理話：「嗱，有一間公司咁咁咁……」回歸搵銀大前提，左丁山為之打醒精神。