I.T（999）上周發盈警，首季中、港兩地同店銷售意外地下跌，令投資者跌到一地眼鏡碎。內地零售疲弱都仲有藉口可以賴，但香港數字之差，就真係無得好講。據政府數據顯示，本港3至5月份服裝銷售，平均升幅係10%，但近年無再大舉開舖的I.T，同店竟然係跌緊10.3%！作為全港最大的服裝零售商，I.T得出此等劣績，只有一個結論，就係佢喺香港嘅市佔率，正在下滑。
今時不同往日。網購普及，令消費者喺彈指間，多了成千上萬個更便宜、但風格品質卻和I.T相類似嘅選擇，令I.T逐漸失去了定價能力。好景那幾年，I.T挾自由行氣勢，每年都可將定價mark up幾成。但現時網上代購成風，很多代理品牌已經唔使只幫襯I.T。自家品牌呢？亦要面對大量其他平價嘅日本、韓國衫競爭。面對呢種景況，I.T只有兩個選擇：1.減價競爭，唔只做promotion，係連定價都要減；2.勁做廣告宣傳，令大家覺得貴啲買佢嘅自家品牌，都物有所值。而兩者嘅結果都係，利潤率會有壓力。
另外，海迪對於老闆沈嘉偉說「投資落盤貨到」、唔願意狠狠清貨嘅做法，亦好有保留。消費者已要求舖頭最好幾日就有新貨上架，你仲攬住啲舊衫想慢慢賣？只能說，希望你成功吧。
海迪
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24