曼聯噚晚喺「香港大爛地」搞嗰場表演賽，之前一票難求，點知前日曼聯突放售1,000張飛，相信黃牛都要炒燶離場。
黃牛黨炒波飛、演唱會飛固然係尋常事，勢估唔到強國人狼死到，連蘋果產品維修預約都有得炒。話說內地蘋果客戶要整機，都要喺網上提前預約。
以北京為例，三間分店每日會派大約500至600個籌。不過普通人，永世都預約唔到。因為「專業炒家」長期吼住個網頁，只要蘋果一派籌，班黃牛就會搶晒。
所以想整機，要先去淘寶。菲菲上網望過，價錢大約10蚊到50蚊人仔不等，維修預約日子，更加係想要邊日，就有邊日，非常靈活。
明明畀錢買蘋果產品時，保養係包埋，免費是天公地道。最好笑係，睇番買家於淘寶上嘅留言，佢哋仲要盛讚黃牛「這家好便宜啊……深圳的10元，可以接受啦……推薦吧……」、「這家服務很好，終於不用天天去刷蘋果頁面了」。
情況就等如你俾個賊打劫，之後佢畀返一蚊打電話，你仲要走去多謝佢，是患了斯德哥爾摩症嗎？或者呢啲就係中國式幽默吧。
Fifi
本欄逢周二、四刊出
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24