許步明、陳茂波夫婦言行，凸顯了特區政府內基督徒政客的嘴臉。
許步明發公開聲明，按常理應是陳茂波通過老婆發聲明，此等行為無規無矩之餘，也盡顯背後兩人政治計算。由於陳茂波乃問責官員，任何言論均會帶來政治責任，而陳本人之拙劣表現及錯判形勢，早已失去公眾信任，每次公開發言均引起更大批評，尤其係引用聖經及新亞校歌，惹起公憤，人人喊打。
貪婪形象深入民心
有見及此，便改由許步明發聲明，一來博同情，再者佢唔係政治問責官員，可以亂噏而毋須負上任何政治責任。
但可惜機關算盡，以為擺事實講道理，最終因一句「囤地就唔止買一幅地」，露出馬腳。由始至終，兩人根本無反省過，認為自己無問題，一切源自傳媒迫害。
陳茂波本人當日在梁振英重組架構中不投票，佢認為自己有機會出任重組後副財政司，寧願睇住689死，也要避嫌，比白更白，何其高風亮節。殊不知數月後被揭劏房，將一切責任推到許步明身上，處理方式之窩囊，簡直判若兩人。
當日重組避嫌，並非制度要求，是陳個人的選擇，何以到咗劏房、囤地，對其個人道德操守的要求忽然消失，只要一日唔犯法，就認為自己無問題。
宗教信仰是人在世俗法律以外，對個人行為的道德規範，本來政客就不應標榜自己宗教信仰，因為政客處理是世俗公務，與信仰無關。但回歸後近年湧現一班標榜自己係基督徒之政客，經常在教會做見證，為領導祈福，而呢群政客所屬教會系統，個別傳道人也高調評議政事，越搞就越醜怪。
到陳茂波在議會上拋聖經，普羅市民對教徒政客不滿由此大爆發。陳之愚蠢係無自知之明，當你講聖經，其政治後果是叫人用聖經標準來要求政客操守，此舉猶如自尋死路。
一方面佢認為只要符合行會及問責官員申報要求，其他所有公眾觀感及道德形象可以不理，但另一方面佢又叫人用宗教信仰之道德標準去評議自己，究竟佢想點呢？
政客標榜信仰係雙刃劍，無風浪時，當然可以建立自己正義形象，但當身陷爭議醜聞時，只會建立一個負面虛偽形象。
早在上次劏房醜聞，二人賺盡貪婪形象已深入民心，人貴乎有自知之明，大家不期然會問：「呢兩公婆係乜嘢人？」
添馬男
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24