以為中資股可以反撲，點知一句審計署查地方債，資源股又「斷正」，逾900隻股份插水，堪比股災，沽空比率近15%，全日成交421億元，直情係陰乾格局。雖說恒指連升五周，但誰敢說近排好炒？盈警冷箭橫飛，債重民企隨時爆，核數師跳船，負面國策打壓，伯老話收水又唔收，加埋大股東高位批股抽水，炒股幾乎成為不可能任務。
呢個時候，沽貨保本係最正路做法。炒即日有糊要食，否則收市一個盈警，聽朝就要嘔凸。業績好都咪開心住，因為呢種市況，有好消息當然係趁機出貨。
中歐光伏談判達共識，以為光伏股有得炒，昨早掃入卡姆丹克（712），即日埋單又輸一成。每日捱幾刀，個本好快灰飛煙滅，離場休息叉下電好過！
好耐冇提過體育用品股，不如講下安踏體育（2020），今年來累升25%，遠遠跑嬴大市。翻查大行報告，對安踏的評價為一眾同業中最佳，近期美林及瑞信均給予「跑贏大市」評級，目標價分別為10.20元及9.50元，較現價仍有約兩成水位。
兩份報告都估計，安踏會是首家走出低谷、錄得經營溢利增長的公司，主要有三個因素：一、同店銷售增長佳；二、明年春季訂貨情況理想；三、節流措施奏效。走勢上，昨先跌後反彈，反映承接力強，如突破旗形升穿8.76元，可考慮小注追入。
魏力
http://www.facebook.com/2012jason
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24