雖然港股踏入業績期，但重磅股匯控（005）、長和系都未派成績表，個市當然悶到嘔泡啦，成交得番400幾億元。超人可能怕大家悶得滯，噚日竟然罕有地宣佈，決定唔開中期業績記者會！眾所周知，每次記者會主菜，都唔係問長和系業務，而係誠哥點樣妙語評價現任政府。今次連「朝聖」機會都無埋，唔通誠哥想以行動暗示啲嘢？
上升空間有限
超人點樣諗，平民百姓當然猜唔透。不過，噚日光伏股就終於唔使再估估下，暫時撥開雲霧見青天。商務部消息指，中國及歐盟就光伏產品爭拗達成價格承諾，中國可以繼續賣貨到歐洲！
大和近日都發表報告指，到訪協鑫（3800）後，管理層強調未來一年的重點工作，就係改善現金流及債務、降低生產成本。該行原先估計協鑫今年蝕26億元，𠵱家預料蝕少啲，但都要蝕19億元，但出年就可以成功扭虧為盈，調升評級至跑贏大市，目標價升近三成至2.25元。
中歐傾掂數，再加大行唱好，對協鑫都好似冇乜嘢大刺激作用，噚日只係逆市升少少收1.99元。
其實睇番走勢圖，協鑫呢個月已經唔知唔覺反彈咗25%，再上升空間實在有限。加上，要補回6月中的巨型下跌裂口，相信都唔係咁易。況且，整個行業都仲處於產能過剩，協鑫今年都仲好大機會蝕錢，真係睇唔到繼續持貨的理由。
瑪姬兒
【動主播召喚 敢你就來】
立即報名： http://anchor.nextmedia.com