一代宗師劉家良上月病逝，上個禮拜舉行喪禮後，遺體噚日移送大嶼山寶蓮禪寺海會靈塔火化，翁靜晶同佢兩個女噚日坐靈車由義莊出發，憔悴嘅翁靜晶到場後負責打點，大女萬儀就手捧爸爸嘅遺照，翁靜晶對住靈柩話：「家良，我哋入去。」現場仲有12隻孝獅同13位大師送行。
火化儀式進行前翁靜晶同兩個女表現尚算平靜，火化儀式完結後，翁靜晶由鄭少秋同冼國林陪同接受訪問，佢話：「完成呢個化身過程，喺佛教徒嚟講係最圓滿嘅終極。」安放骨灰方面，翁靜晶話因蔡伯勵師傅指今年未有好日子，最快到年尾先可以安放，翁靜晶又話想將劉德華題嘅字雕落石碑。
忍唔住喊
之前翁靜晶向邵氏追討電影分紅，佢話：「因為我守緊八關齋戒，盡量少講嘢，不過最後通話時佢哋（指邵氏）話開會，畀啲時間佢哋好應該，等師傅七七四十九日過後，即係8月10日，我哋再作分曉。」之後佢安排記者影相，呢個時候翁靜晶望住火化爐開始喊，冼國林叫佢去食齋，佢都喊住話：「我唔會去，你哋走，我要喺度陪佢。」
其實𠵱家一般香港火葬場係用電子點火或油渣燃燒，寶蓮禪寺係僅有依然燒柴嘅地方，據職員話火化過程要大半日，假如11點開始火化，下晝3點就要加柴，而家屬仲要向食環署申請，佢哋會派職員到場視察，仲有寶蓮寺規定只有高僧先可以進行點火，名為「舉火儀式」，家屬就算係另一半或子女都唔可以，所以噚日劉師傅就由釋智慧大師進行舉火儀式。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！