一年最難捱絕對是暑假，沒假期之餘，返工出太陽，放假落大雨；好不容易等到收工食飯，多了班學生同你爭，沮喪程度好似年尾冇花紅派咁，近排同班死黨密謀「逃出香港記」，眾人共同目標：過着豬一樣食、玩、瞓的假期。
首個出局當然是「鴨仔團」，跟團每次都覺得好似幼稚園郊遊：各位帶齊野未？大家唔好走散吖！影張團體相，大家企定定，1，2，3，笑！隔離有廁所，邊位同學想去請舉手？記得聽朝7點鐘食早餐！「體貼」程度遠勝阿娘，Samantha心領了。出遊大多後生已傾向透過旅遊網站扑鎚，便利之餘，訂酒店可免費取消，呢類網站財源滾滾來！
同樣，雖然大陸經濟放緩，旅遊生意仍在井噴階段，全球旅遊研究機構PhoCusWright報告指，舊年第二季強國旅遊網站點擊率按年激增四成，較整體增長7%高數倍。
復星國際（656）前排與私募基金AXA全購法國Club Med，仲唔係食盡呢個大潮流？ Samantha覺得不太樂觀，第一是強國人仲停留「到此一遊」階段，自由奔放式渡假未成氣候，第二是前排再提高收購價，有冇肉食成疑，現時炒復星只可炒「菜鳥網絡」。
Samantha
本欄逢周一、三、五刊出
【動主播召喚 敢你就來】
立即報名： http://anchor.nextmedia.com