早排講過外國科企CEO多數鍾意早起早返工，咁本地大孖沙又點呢？貴為老闆，當然同打工嘅CEO唔同，聽聞恒隆地產（101）主席陳啟宗、新世界發展（017）主席鄭家純同恒基地產（012）主席李兆基多數中午前後先現身公司㗎。
誠哥呂志和愛早起
城中大孖沙，出名早起嘅一定係長實（001）主席李嘉誠，佢6點未夠就起身去打波、做運動，之後就返工，同佢差唔多年紀、84歲嘅嘉華國際（173）主席呂志和聞說亦好早起，9點或之前返工。
新鴻基地產（016）大股東郭炳江、郭炳聯就最鍾意工作，放假都會走去睇自己或其他發展商嘅樓盤或商場；平日返工，佢哋通常9點、10點已經坐喺公司。即使個人唔喺公司，郭炳聯亦會好快回覆同事嘅電郵，半夜12點過後畀電郵佢，佢都會即刻覆，聽落真係相當勤力。
不過，晏返公司都唔等於唔勤力，好似「梁粉」陳啟宗，雖然聽聞佢通常11點至現身，但佢百足咁多爪，又話成日周圍飛，可能返工前已經開咗幾個會都未定。
鄭家純就出名晏返啦，最有機會喺早上10點半至11點，喺中環新世界大廈大堂見到佢。比較晏嘅可能係四叔，如果冇會議，佢多數食完晏先現身國金恒地總部㗎，呢啲真係偷得浮生半日閒。
李華華
mailto:[email protected]
【動主播召喚 敢你就來】
立即報名： http://anchor.nextmedia.com