灣仔老牌中式酒樓喜萬年，6月底遷出屹立41年嘅熙信大廈舊址，暫別市場兩個月後，華華近日收到喜萬年經理來函通知，話酒樓鐵定8月8日（下周四），喺區內英皇集團中心重新營業，信中仲特別註明，新店仍由舊舖原班舊廚主理。
維持原班舊廚
喜萬年係金融業志同會，華人賓架們幾十年聚腳嘅竇口，華華有幸，靠行會成員兼志同會會長陳智思個朵，與該會秘書長兼前南商銀行副總經理吳連烽，喺6月底酒樓搬之前幾日，搭到尾班車有房食晏，先至品嚐到佢哋嘅必食乳豬、清蒸斑同老火靚湯。
咁啱上周喺中環巧遇連烽兄，大家講起志同會重開後，不如又食一餐，佢之前亦話，最緊要新店廚房爐頭，繼續火力夠猛，烤出靚乳豬！
喜萬年亦保證，陳榮師傅打骰嘅鎮店之寶──頂級金牌脆皮乳豬，中廚「大鼻」梁師傅炮製嘅鮑魚、高湯翅同大小菜式，同埋IQ周師傅嘅傳統粵式點心，繼續奉客。
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24