招積度100%　雷電爆飛

雷電者，乃雷諾電車Twizy之暱稱，造型古怪中帶點可愛，升起一對如林寶堅尼般的鉸剪車門，招積度達100%；電摩打驅動，叉滿可續航100公里，而且扭力一踩即有，燈位起步爆贏好多大馬力車！

記者：徐影龍

攝影：周旭文

模特兒：Kabby@GME

一車不能藏長腿

Twizy外形的骰圓碌碌，四個轆凸出車身，其實似高爾夫球車多過似街車。又扁又窄之車身，加上懸掛外露，輪圈又似核輻射標誌，走在街上，基本上無人忍得住唔舉起手機拍照；開門落車更是不得了，如林寶般的鉸剪式車門，升起後似打開一對翼，招積程度更是爆晒燈。
車長2,338mm，一般小車格局，但闊度卻只有1,080mm，比smart fortwo更窄，令車身顯得相當纖瘦。雖然車櫳空間極度有限，但仍有1＋1雙座位設計，只是後座Dog Seat真的很Dog Seat，我這高個子單拖坐尚算無問題，不過長腿Kabby想跟車坐後座便有點難度，必須先分開雙腿、再夾住前座嚟坐，儀態盡失。駕着Twizy，別妄想泡高妹了。

坐後座雙腿不能擺在同一邊，需分腿而坐，有點辛苦。

車輪及懸掛凸出車身，轉彎預位時要留意。

一切簡約為主，無電子輔助裝置，近乎全機械操作。

三腳插設在車前，普通拖板也能叉電。

運輸署話難定位

雖然條件所限，只能在鯉魚門附近試車，但已叫人印象難忘；的骰車身令迴旋半徑很小，轉窄彎、泊位相當Easy，不過全無電子器材輔助，連風油軚也欠奉，慢車時扭軚好辛苦。最好玩是直路加速，電摩打特性是扭力大兼迅速輸出，燈位起步時一踩即飆，比身邊許多大馬力私家車還要爽快利落，連上山跑大斜也感覺輕鬆，厲害！
鋰電池藏在駕駛艙前方，叉滿電可行駛100公里，最高速度更可達80km/h，除了入機場限速110km/h時會被巴士「爬頭」外，基本上在港行駛已足夠。車價只12萬，免稅又慳油費，可惜運輸署指Twizy沒有M1牌（歐洲的私家車認證），不能列入私家車類，但裝設四輪又不能當電單車，法例下定唔到位，難以出牌，最後可能只有在大集團或大型屋苑內使用了。