上周四推介惠理（806），即日收市後發盈警，嚇咗唐牛一跳，不過睇番通告，盈利大跌係由於初投資本及旗下基金所作投資錄得公平值虧損，撇除有關虧損，經營溢利勁升42%至1.26億銀，名符其實假盈警。上周五最多曾跌6.5%，埋單僅跌2.7%，似借好消息出貨多啲，同時消化超買壓力，有利日後延續升浪，壞事變好事。
另一個星級基金經理劉央就冇咁好彩，繼美即（1633）失驚無神插水12%兼拉閘後，另一重倉股中金再生（773）竟被證監要求清盤。睇番中金再生盤數，舊年中期應收賬連票據總額達151億銀，相當於總收益四成，亦佔流動資產逾六成，財務狀況絕不健康。以劉央持股7%計，市值達7.8億銀，一旦撇賬都幾傷吓。
中歐就光伏產品價格終達成協議，貿易爭拗告一段落，懲罰性關稅陰霾消除，再配合阿爺早前補貼廿年嘅承諾，相關板塊肯定有排炒。
早前推介嘅卡姆丹克（712），6日最多升17%，近排回落至前浪頂2.2元有明顯支持，上周五彈高2.7%，似為新一輪升浪熱身，戰友請把握最後上車機會，維持見三字頭目標。
唐牛
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24