你話陳茂波Cheap，丟特區政府架，點都未夠大球場塊薯仔田丟架，因英超球隊來港作賽，呢塊薯仔田，巳經世界聞名。大球場草地問題，大大話話都困擾咗十幾年，仲記得當年仍由溫布萊公司管理時，草地問題已經浮現，之後由康文署接手，以為已經搞番掂，但幾場大雨，一切又打回原形。
一個球場都搞唔掂
我作為球迷，真係唔明白究竟點解塊草地十幾年都搞唔掂，有時真係替球員、球迷及班主慘。首先英超球員個個身價貴，球隊最怕開咧前主力受傷，如果我係領隊，一見大球場塊地，立即收起主力，唔好話尹佩斯，就連廢廢地個韋碧克都扮病唔出場，而出場嘅自然會就住踢，你話場波點會好睇。
至於球迷，除了捧球星，當然希望比賽精采，唔好hea住踢，但場地如此質素，比賽水平自然下降。
搞外隊嘅班子就更慘，冇面之餘也令盛事褪色，貼錢買難受，如果唔徹底解決去水問題，以後搵你搞外隊。
連一個球場管理都唔掂，你認為香港還有甚麼競爭力可言，香港要keep住國際城市形象，不外乎幾招，一是舉辦大型國際性會議，但一年來冇聽聞政府有乜計劃，其次是搞大型體育盛事，但𠵱家數來數去，真正國際級只有七人欖球賽，其他表演成份多，過去沙龍網球公開賽都搬上去北京好耐，以前東亞四角足球賽皇朝盃，香港、日本、南韓、中國四隊火併，亦十分有睇頭。
另外要保持香港地位，政治上特首要keep住在國際傳媒曝光，但上次689訪美受冷待，巳睇到西方世界貶低香港地位，今非昔比。689一條土炮，港式英語，又冇幽默感，點可能受國際傳媒歡迎，佢絕對比唔上老董及煲呔，甚至林鄭及曾俊華都強過佢。
689阿Q式自我安慰，就係自稱搞內交，但實情北京冇同佢顛。佢自己想訪京，點知又安排唔到。到北京述職，又冇人刮，搞到自己無厘頭走去天津扮有行程。其實去省市拜訪冇乜用，連本土傳媒亦唔重視，去過都冇人知。
香港地位迅速下降，大球場塊薯仔田，只不過好形象化地突出香港之墮落。咁又難怪，成個政府只做起屋一瓣，唔墮落有鬼。
添馬男
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24