一碗粥差啲令鄒市明老貓燒鬚！前晚喺澳門金光綜藝館打嘅「皇金拳賽II」壓軸出場，同18歲嘅墨西哥拳手奧迪特加打足6回合先分出勝負，中國奧運雙金嘅市明喺第4回合仲越打越無力，原來元兇係一碗超鹹嘅粥累事，仲俾著名教練Freddie Roach大鬧一餐！
「啱，打完比賽後，我俾教練喺房間鬧咗一餐，佢主要係話我賽前冇食米飯，只食一條能量bar，只會頂到頭3回合，終於教練真係冇講錯，我喺第4回合開始無力，好彩頂得住。」鄒市明喺今年初才轉做職業拳手，前晚係佢第2場職業賽，佢繼續招供：「其實我唔係唔想聽教練話，但我4月喺澳門同一地點打嘅第1場職業賽，由於賽前食得太飽，比賽時好難受；所以今次唔想食太飽，冇食飯，只食粥同一條能量bar，但碗粥太鹹，我食少少就冇食；呢啲係經驗，我𠵱家喺每場比賽都學到嘢。」更何況今仗佢嘅拳酬有成50萬美金（約387萬港元）。
餓到力不從心
32歲嘅鄒市明前晚吸引唔少強國拳迷到場，頭3回合以快拳稍佔上風，接近中尾段時，「粉絲」比市明仲要緊張，KO、KO之聲叫個不停（佢4月第1場職業賽亦只係以點數取勝），只係大家都唔知原來餓到暈嘅佢已力不從心，中途更被對手打腫左眼袋位置，佢話：「呢場只係我第2場職業賽，慢慢改善喇，我一啲都唔介意被打傷，呢啲係拳擊嘅一部份，你哋影多啲啦（眼袋）。」
市明今次冇老婆同囝囝陪比賽（佢哋留喺美國），佢賽後都難掩思念之情：「我𠵱家好攰之餘，亦好掛住家人，太太亦喺美國睇我呢場比賽。」之但係市明仲未返得去美國住，因為噚日已飛去北京嘅佢，幫同一經理人公司Top Rank嘅星級拳手帕奎奧11月係澳門比賽造勢。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange