【灣仔→尖沙嘴】今日曼城同同鄉嘅英超球隊新特蘭，喺大球場爭巴克萊亞洲賽冠軍，噚日曼城一班球星留港最後衝刺，出動濕平仲連底褲都唔放過。
噚日下晝1點半左右，三名曼城球星迪斯高、拿斯達錫同高拉洛夫離開下榻嘅灣仔君悅酒店，坐的士過海去咗尖沙嘴扮自由行濕平。佢哋有晒目的，一落車就去咗睇時裝，試衫期間仲引到成班自由行圍觀，搞到店員要拉簾，好多女店員仲捉住佢哋合照。不過搞鬼嘅高拉洛夫忽然拉開塊簾對住圍觀者扮驚嚇樣。喺第一間濕平完之後，佢哋轉去另一意大利名牌買衫，不過佢哋最有興趣居然係底褲，店員拆晒畀佢哋睇款，三個對三角形底褲都情有獨鍾，買完底褲就繼續行程。
噚日5點幾鐘，曼城幾位球員薩巴列達、查維加西亞等5個人又一齊出動，去咗中環蘇豪區飲啤酒，不過見到有記者跟住好似唔係好高興咁。
熱刺親民會粉絲
熱刺今晚就會同南華爭季軍，雖然冇得爭冠軍，不過前日佢哋依然交足功課去咗操練，一直到夜晚8點至返灣仔君悅酒店休息。酒店門口一早就有成20個球迷喺度等緊，有啲球星好似柏加都好親民，走埋去簽名同影相。大概半個鐘之後，熱刺門將洛里斯同丹普西等一行四人落番樓，上咗酒店嘅車，駛去中環四季酒店，酒店一早就安排咗位外籍職員招呼佢哋，之後帶咗佢哋入咗間西餐廳開餐。
採訪、攝影：彭琮然、徐錦池、梁繼光、吳耀輝
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24