【隔牆對論】
新界東北戰場，除了「茂波囤地」，還有粉嶺高爾夫球場。這一回，保育派與發展派立場face-off。
高呼「不遷不拆」的，是「發展派」自由黨李梓敬。12歲已打golf的他認為，多元城市規劃，應保住上流人士用地需要，「我絕對覺得，社會上有一種仇富、仇高爾夫球情緒」。
力主推土機鏟平大半個球場去起樓的，是「保育派」新民主同盟范國威。不打golf的他反問，土地發展，為何只許富豪打golf，不許平民百姓安居樂業，「我唔認為係仇富，係社會不公義」。
記者︰雷子樂 姚國雄
記：《蘋果》記者
李：自由黨青年團主席李梓敬
粉嶺高球場佔地170公頃，根據土木署每100萬人需要1,000公頃住宅用地準則計算，高球場用地足可供應給17萬人居住，剛好是整個新界東北發展計劃打算容納的人口。
記：你是否贊成收回粉嶺高球場用地起公屋？
李： 唔贊成。城市規劃應多元化，令每個階層都有適當用地。我哋需要基層住屋，要有中產設施，同時要有用地畀社會上一啲比較上流人士享用。如果香港冇晒遊艇會、高球會，對好多想努力由基層、中產向上流動嘅人，會失去誘因。咁香港仲係咪一個宜居城市？
新加坡地方比香港細，但有18個高球場，香港得6個。但香港有48%人住資助房屋，英國只佔三成，德、日少於兩成。新政府傾向民粹，向仇富主義低頭，一有地就起公屋。東北發展將公營房屋比例由48%增至60%，但中產都有置業需要，如果將上車盤比例壓低，只會令樓價繼續高企。
記：但民間團體的方案，只建議收回三分之二個高球場，高球會會員仍可打波。
李： 粉嶺高球場係唯一私營球場有3個18洞球道，香港要舉辦國際賽事，只能喺粉嶺進行。原居民係希望東北盡快發展，如果解決到長時間居住非原居民嘅住屋需要，其實絕大部份居民係支持發展東北。𠵱家最大阻力，都唔係住喺嗰度啲人，而係例如環保團體，漠視咗當區居民需要。
記： 發展規劃是否不公義，偏袒原居民？
李： 係賠償問題，原居民係滿意賠償；反而係非原居民、租客，只要政府處理番賠償問題，反對聲音可解決。
記：但有些人要求不遷不拆，是要爭取鄉郊生活。
李： 如果你問香港市民，想繼續成為有高球場、高樓大廈嘅國際大都會，定係發展成務農為主、有機耕作嘅城市？自由黨當然希望香港係大都會。唔排除部份人嚮往田園，但發展同保育，好難並存。
記： 為何要保住2,500人打高球的權益，但犧牲一萬人的住所？
李： 你講嘅係功能性問題，但有一樣嘢係原則性問題。咁點解我哋唔將李嘉誠三成身家，分畀最基層三成市民？呢個係平均主義，功能化咗成個系統。
現時根據「私人遊樂場地契約」低租批出的土地，兩大高球會的球場，佔去當中63%土地。
記： 高球會只交1,000元地價，1元年租，會籍卻炒到天價。這樣運用土地是公義嗎？
李： 政府要檢視租金，球場開初嗰時，交低租金係合理，因政府唔想投資，交畀私人機構做。但粉嶺高球場已有一段日子，政府要檢視係咪仲應用咁平租。
記： 會員入會要等十年，你所謂的讓人「力爭上游」，其實是否假象？
李：向上流嘅目標，永遠有scarcity（匱乏），畀得起1,500萬都好，排隊可能等十年或以上，因現時使用率已好高。要解決排隊問題，要諗吓係咪場地太少，唔夠畀社會上成功嘅人士？如果政府想發展高球，應投放更多資源發展高球場。
點解咁多人排？因為係一個成功象徵。啲人咁勤力，社會要對佢有個肯定。
如果你將成功人士嘅權利都剝削，同共產有乜嘢分別？
今年4月，李梓敬上街爭取市區高球練習場，被網民嘲諷「儍的嗎？」
記：如何看網民反響。
李： 我絕對覺得，社會上有一種仇高爾夫球情緒。上次幫長沙灣高球場，網民有意見。如果我去爭取足球場，享受嘅人其實少好多，一場波得20人，但市區高球練習場，（使用率）長期爆。有反響，係因佢哋仇恨高球象徵嘅社會階級。如果你將成功人士嘅權利都剝削，同共產有乜嘢分別？
記： 但土地不足，還要捍衞一小撮人打高爾夫球的權益？
李： 舊年梁振英選特首，不斷咁話香港有唔少土地，但上任後突發現香港土地好少。其實香港有好多農地，唔夠地嘅說法，究竟係特區政府想製造仇商仇富情緒，去舒緩市民對佢哋嘅怨氣，定反映佢無法兌現選舉嘅承諾、對發展土地嘅無能？
記： 可否形容，你支持粉嶺高球場不遷不拆？
李： 可以咁講。
mailto:[email protected]
【動主播召喚 敢你就來】
立即報名： http://anchor.nextmedia.com