【圓方】寰宇電影公司老闆林小明同前妻趙雪英離咗婚都有一段日子，兩個人最後仲要對簿公堂，真係聽落都令人好欷歔。不過喺好嗰方面諗，兩個人身邊都出現另一半，可以重新開始新生活。一向都冇乜緋聞嘅林小明，星期日下晝4點幾，一身街坊裝打扮，短褲、踢拖鞋去咗西九龍嘅圓方商場行街，身邊仲蹺住一位妙齡少女。
女伴專攻首飾
相對林小明嘅街坊裝，嗰位少女嘅打扮都算入時，粉紅色上衣襯白色短褲，手挽一個Gucci小手袋，不過位少女雙腳有幾塊瘀傷，望落唔係咁好睇。佢哋起初漫無目的喺商場裏面window shopping咗一陣，最後入咗一間專賣銀器、首飾嘅國際名牌店入面睇飾物，見位少女睇得好入神，對一啲手鈪特別有興趣，不停叫店員畀唔同嘅款佢試戴同睇，反而喺一邊嘅林小明百無聊賴，仲見佢除咗左腳嘅拖鞋，然後用左腳趾同右小腿頴痕，前後維持咗一分鐘。
訂飛睇五點場
最後到畀錢埋單嘅環節，林小明卒之可以出手，佢簽完卡後，兩人又再蹺手行咗去商場內嘅戲院，原來佢哋已經訂咗飛睇5點場電影。見仲未夠鐘，身為電影公司老闆嘅林小明，對戲院外面播放嘅電影片段好留意，特別係導演黃修平嘅新作《狂舞派》，佢哋企足10分鐘睇片，似乎對套片好有興趣，到差不多夠鐘佢哋至入場。
採訪、攝影：陳辰
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第三集足本放送中！速上：
http://hk.apple.nextmedia.com/livestream/channel/talk24