派對處處有，中環特別多，每逢聖誕節、萬聖節，中環到處嘩鬼出沒，而石板街則最猛鬼，只因這裏有不少派對服裝店，其中「天神村」最大堆頭，由性感小野貓到葉問的唐裝，一應俱全，吸引不少名人光顧，包括「地上最強」甄子丹。沒料到丹爺卻不買葉問服裝，反高潮到極。天神村開業11年，一直為客人提供最驚嚇的派對造型，老闆夫婦卻從不開P。
記者：中環特工隊
香港的派對動物，十居其九雲集中環，因此孕育出石板街成行成市的派對服裝店，而天神村貨品可算是全街最齊，派對服、面具、假髮、制服，不少老外買完便直衝蘭桂坊，也有派對老手自備圖樣訂造。明星客仔包括甄子丹、李克勤、袁詠儀，其中甄子丹更是每年萬聖節都幫襯。
店員Debbie透露，螢幕中霸氣十足的宇宙最強，原來是緊張大師，「佢帶仔女嚟買嘢，冇架子，但好有要求，面具會唔會焗親？戴帽會唔會拮親？佢嘅小朋友鍾意乜嘢佢都support（支持）」。
中環人緊貼潮流，就連開派對也要學足電影角色，老闆娘陳秀雲（小雲）解釋：「魔盜王嗰排，一星期幾個海盜party；葉問上畫，又多咗人搵唐裝衫。」熱潮稍縱即逝，賣不去怎辦？「入錯貨好閒啫，過一排又興番㗎啦！」女中豪傑，談吐豪爽。
「7號我畀個官你做啦！聽日一定走到貨吖嘛？」訪問期間不時傳來小雲的咆哮，正勞嘈地催促廠家，電話剛掛，連忙又撥一通電話下單，「48吋長，25吋闊」。卡通片IQ博士中，主角小雲架着粗框眼鏡，身型矮小；這位中環小雲卻高頭大馬，聲如洪鐘，找她要看時間，只因小雲「三點不露」，「哈哈，係呀！我hea下hea下又一日」。
多次自嘲「好hea」的小雲，其實精力無限，年輕時為旅行而打工，「打幾個月工就去旅行，唔算叛逆，有理想啫」。中國大陸、歐洲，不論遠近，千里走單騎，天地任我行。後來營商一樣玩即興，當過OL，在粉嶺開過車仔麵店，11年前租下石板街現址，最初售賣玉石，其後因生意欠佳轉賣派對用品，因從小喜愛卡通片《IQ博士》，因此店名也叫「天神村」，自己就是主角小雲。
記者稱呼小雲作派對皇后，沒想到答案很反高潮，「我從來唔開party㗎喎！」她浪迹天涯毫不畏懼，卻最怕與客周旋，「客人問：『今日有party，着乜嘢好，邊啲着得我瘦？』呢d最麻煩，我都想瘦呀！我唔sell客，無耐性呀，會躁底㗎，哈哈！」因此，小雲主要當軍師，負責入貨。
在天神村工作多年的Debbie，只好擔起形像指導重任，會對客人說：「你要型？要靚？定grand（高貴）？定要贏？贏就要反串，男扮女、女扮男，要周圍嘅人嘩嘩聲，咁你就贏㗎喇！」
小雲小吉睇場 互補長短
連記者在內，原本一個墟聊得興起，眼角卻瞄到一位紮馬尾的中年男子，不停在天神村跟對面唐樓之間來回走動，「呢個咪小吉囉，哈哈！」小雲口中的小吉，就是店內唯一的男丁，老闆李定國（Albert），記者轉移目標纏着他，但見他時而跑到貨倉取貨，小雲一聲令下，又隨即跑到擺花街收貨，怎麼老闆比夥計更忙？他解釋：「嘿，啲客多數女人，我一個男人唔方便嘛，搬搬抬抬咪等我做囉！」說起來臉帶腼腆。
小雲說話咇哩巴啦，小吉卻溫文得猶如文學老師，唯一相似之處是我行我素，「我之前35年返工都要較兩個鬧鐘，𠵱家瞓醒咪返工囉」。原是海關總關員的Albert，五年前退休，便全情投入打理天神村，雖已年屆花甲，仍每天做足12小時。海關跟無腳的雀仔，原本大纜都扯唔埋，直至1985年一次哈爾濱之旅，「人哋話千里姻緣一線牽，我哋就萬里」。
儘管已一起走過26個年頭，而且朝夕相對，二人卻少有磨擦，於Albert眼中，老婆簡直零缺點，「人冇完美，但佢冇短處，呢個老婆full mark（滿分）」。對於小雲神龍見首不見尾，Albert為愛妻辯解，「佢好忙㗎，email呀、入貨、諗嘢，本身咁多嘢做，仲理呢啲濕碎嘢咩」。原來「諗嘢」都算重要工序，而計算運費則只屬「濕碎嘢」，粗心的小雲便忽略了，「Group埋運費咪平啲囉，有時突然間嚟一箱，運費起碼都百幾蚊，佢冇諗㗎！」
聊着聊着，小雲的大嗓門又響起，「喂！搞掂未呀？我去買餸呀！」隨即揚長而去，留下Albert繼續擔擔抬抬，難怪小雲對老公讚口不絕：「100分滿分，佢有101分㗎，不過我都有120分，哈哈！」畢竟，在二人心中，小雲同小吉都好重要！
中環爆料熱線
WhatsApp：9499 3777
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第三集足本放送中！速上：
http://hk.apple.nextmedia.com/livestream/channel/talk24