拜仁慕尼黑喺上季歐聯對住巴塞隆拿，兩回合計狂炒7:0晉級決賽，事隔大約3個月，拜仁又對巴塞派蛋。拜仁喺周三熱身賽漢尼斯盃迎戰巴塞隆拿，主帥哥迪奧拿倒戈對住陣容不整嘅巴塞，變陣大玩無鋒陣仍能輕鬆贏2:0，季前熱身賽7戰全勝迎接周六德超盃，睇嚟哥帥嚟到德國球壇，威力都冇減到噃。
哥迪奧拿喺上年離開巴塞，休息一季之後出山接手教拜仁，未正式教之前，外界都有啲對佢質疑嘅聲音，點知到𠵱家一直表現非常對辦。拜仁喺周三迎戰巴塞，對手雖然有球王美斯正選披甲，但新兵尼馬同沙維等一班西班牙國腳仲放緊假，新帥馬天奴亦未報到，實力同拜仁自然有啲距離。
舊瓶新酒 無鋒陣奏效
巴塞同西班牙國家隊近年周時踢無鋒陣，哥帥喺呢場波都將呢一套放喺拜仁度，用湯馬士梅拿擔任「假9號」，隊長拿姆亦被安排放喺進攻中場位置度，結果後者喺14分鐘先開紀錄，到咗下半場巴塞換晒全隊𡃁仔上陣，拜仁由後備入替嘅前鋒文迪蘇傑喺87分鐘入多粒奠勝，季前熱身賽7場贏晒。
第一次倒戈對住舊主，哥迪奧拿賽後感觸良多：「對我嚟講呢場波真係好特別，喺我生命裏面，一直都係巴塞嘅球員同教練。其實我接手呢支拜仁本身陣容已經好強勁，我對佢哋嘅能力真係冇嘢好挑剔，佢哋亦好容易咁理解到我嘅足球理念。」拜仁好快又會同上屆歐聯另一冤家碰頭，就係喺周六德國超級盃對住多蒙特，繼5月歐聯決賽之後再交手。
美斯澄清：同馬天奴唔熟
美斯喺今場波冇乜表現，佢喺賽後話最高興係確定自己傷勢已經十足康復，對於近期有傳巴塞請馬天奴接任新帥係佢嘅意思，阿根廷球王趁機劃清界線：「首先我認為馬天奴係好教練，但我冇要求巴塞簽佢，呢個係主席羅素嘅決定。況且我同佢都唔係好熟，見都未見過。」美斯就醒得多，唔似馬天奴喺日前接受訪問嗰陣，唔避嫌公開多謝美斯，冇厘醒目，真係擔心佢點教巴塞。
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第三集足本放送中！速上：
http://hk.apple.nextmedia.com/livestream/channel/talk24