思捷環球(330)早前被剔出藍籌之列,𠵱家除咗繼續努力執靚盤數,似乎亦想加強董事局陣容,等投資者對呢間公司嘅企業管治增強信心。公司噚日宣佈,委任聯交所上市委員會主席李嘉士(圖)做獨立非執董。
思捷非執行主席柯清輝話,邀請李嘉士入董事局屬於「人才儲備」,加上思捷董事局𠵱家冇律師,港交所(388)正在推廣董事局多元化,佢識得李嘉士,於是邀請對方做獨董,就係咁簡單。
53歲嘅李嘉士係胡關李羅律師行合夥人,2009年加入上市委員會,舊年起擔任委員會主席。有上市委員會成員對佢讚不絕口,指佢做事認真、專業,每次開會都做足準備工夫,提問亦相當中肯。照咁睇,思捷有佢,應該可以加番少少分數啩。
倪匡、蔡瀾同肥佬黎約埋一齊《亂噏24》,你睇咗未?
唔睇冇話題,第三集足本放送中!速上:
http://hk.apple.nextmedia.com/livestream/channel/talk24