英國皇B佐治仔禮拜一出世了，舉國洋溢歡欣氣氛，媽媽凱蒂翌日帶仔仔步出醫院同大家打招呼，佐治仔表現好淡定，冇俾啲鎂光燈同歡呼聲嚇親。當地傳媒隨即擦鞋，讚佢一出世就係做皇室人員嘅材料，呢頂高帽派得好穩陣。因為呢句話係套套邏輯，同亞媽係女人無分別，即係永遠都唔會錯，事關無論佐治仔將來勤政愛民做好榜樣，抑或行為不檢損害皇室形象，佢blueblood嘅身份，都係抹唔甩。唔使驚好似近期本地某風水名嘴咁唔好彩，幫人指點迷津時吹到天花龍鳳，結果唔靈搞出個大頭佛，俾人放火尋仇咁大劑。
歐美日回氣 中國獨憔悴
講開英國，雖然滙控（005）早前出報告踩英鎊，擔心如果美英息口走勢背馳，英鎊會碌落1.4美元。但唔知係唔係英國皇B腳頭好，當地經濟近期漸見起色。
例如當地上市公司，上季派息創新高，有調查估計，當地金融服務業職位增加招聘，未來會帶動該國創造25萬個職位，而噚日新鮮出爐嘅數據顯示，第二季經濟按季增長0.6%，比首季強一倍，仲係兩年嚟首次跨季增長，各主要環節都有增長，情況係近三年來首見。
事實上，環顧全球主要經濟體系，除咗祖國獨憔悴，歐美日近排啲數據都靚仔返，歐元區製造業採購經理指數，上月就出乎意料上返50點嘅盛衰分界線，創年半新高，日本仔亦連續三個月調高經濟展望，所以聯儲局主席伯南克前周發表撐低息言論後，美元偏軟格局仍未變，歐元近期係1.3至1.32美元徘徊，英鎊就係1.52至1.54美元上落，睇怕最快都要等儲局下周議息後，才有較明顯的方向。
《華爾街日報》噚日講，下屆儲局主席之爭已入直路，只剩低副主席耶倫同前財長薩默斯跑最後400米，耶倫嘅優勢係可獲得局內人支持及可延續伯南克嘅政策，而薩默斯就同奧巴馬熟啲，所以現時仍難分勝負。雖然兩人都係著名經濟學家，嚴格嚟講薩默斯學術聲譽更強。
加息機會增 紐元企硬
但有人曾經幫佢兩個翻舊賬，發覺耶倫掌評估經濟形勢準好多，例如美國樓市06年爆煲前後，佢都曾經作出多次預警，反觀薩默斯就錯多過啱，加上佢份人出名難相處，如果佢真係接伯南克棒，金融市場初時應該會幾波動。
新西蘭央行噚日維持利率係2.5厘歷史新低，合乎預期，重申今年內應該繼續唔郁，幾時加息視乎樓價上升會唔會推高通脹，立場冇之前咁中性，市場估計新西蘭央行，出年1月加息機會升至四成，紐元噚日升逾1%，扯上80.48美仙的近五周高位，前景仍秤高少少。
奇兵
本欄逢周五刊出
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第三集足本放送中！速上：
http://hk.apple.nextmedia.com/livestream/channel/talk24