如果想轉工，最好報番啲課程自我增值。有乜嘢課程最啱大市需要？八方發現呢方面，工聯會都幾緊貼時勢㗎，佢哋今年嘅秋季課程中，就有個課程教授「語言自衞術」，課程簡介講明，希望幫助學員喺遇上難纏對象時，以「語言自衞術」拆招，似乎想教識大家好似狼英同謬波咁，施展語言「偽」術「自衞」。
呢個為期12堂、每堂個半鐘，學費550蚊嘅課程，噚日喺網上熱爆，簡介話明課程內容包括教授「狙擊破解法」，例如喺關鍵時刻，「透過一些柔性說話、合宜的回應技巧，既可緩和氣氛，又能避免破壞關係」。好多網民話最想知道，工聯會係咪搵狼振英同陳謬波做星級老師先？事關若論香江語言「偽」術高人，狼英認第一、可能只有謬波敢認第二咋喎。
「太太及家人」㨘靚招牌
有網民話呀，由劏房波到酒駕波再到囤地波，陳謬波似乎已經青出於藍，最近佢以一句「太太及家人」嚟形容老婆同阿仔，試圖避過利益衝突之嫌，真係令港人「嘆為觀止」，有人講笑話真係好想學番一招半式傍身。
但都有人話，呢兩位「偽」術大師講多錯多，搵佢哋嚟教只係反面教材；有人則叫工聯會實實際際開多啲「防狼班」好過啦，覺得咁樣先係真正「自衞」。
mailto:[email protected]
【動主播召喚 敢你就來】
立即報名： http://anchor.nextmedia.com