今年係百變天后梅艷芳逝世十周年紀念，馮仁昭收到風，梅姐一班生前好友同徒弟，都希望幫梅姐搞慈善紀念演唱會悼念。據知，當年同梅姐「稱兄道弟」嘅譚詠麟、曾志偉、陳百祥會扯頭纜，連梅姐契妹羅美薇嘅老公張學友都會幫手。
至於梅姐一班徒弟好似何韻詩、草蜢、許志安等，都想為師傅盡一分心力，如果可以請埋梅姐生前好友劉德華，就盡善盡美！由於距離梅姐死忌12月30日仲有一段日子，佢哋𠵱家開始商量可行性，不過梅姐死忌撞正紅館舉行容祖兒跨年演唱會，所以梅姐悼念騷唔能夠喺紅館搞，惟有另覓場地。
好友徒弟研究中
馮仁昭噚日打電話向梅姐生前經理人王敏慧求證，佢話：「𠵱家同梅姐一班好友同徒弟研究中，大家都好想成事，相信齊心就事成。」另外，同梅姐非常老友嘅設計師劉培基，講到佢唔鍾意幫人設計婚紗，但就喺阿梅生前最後一個演唱會，幫佢做咗件婚紗，劉培基話：「一個女人咁重情重義，為男人付出咁多，每次佢失戀都會問我點解係佢唔啱，佢無助嘅眼神，令我好深刻。」
撰文：馮仁昭
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第三集足本放送中！速上：
http://hk.apple.nextmedia.com/livestream/channel/talk24