【灣仔→銅鑼灣】最近來港參加巴克萊亞洲賽嘅球隊新特蘭，上仗喺落後另一英超球隊熱刺一球之下，最後反勝3比1，表現出色，將會同曼城爭冠軍。噚日一班新特蘭球員趁住空閒，由領隊迪肯尼奧同隊長奧沙帶隊，一眾球星變身自由行去咗行街濕平。
噚日大概朝早10點，新特蘭十多名球員離開下榻嘅灣仔君悅酒店，坐24座旅遊車去咗自由行至愛嘅銅鑼灣。架車喺時代廣場停低，球員即刻兵分兩路，身為隊長嘅奧沙負責帶球星施巴斯坦拿臣、格列加特拿等隊員先去買咗杯咖啡嘆住行，比較悠閒。
反而迪肯尼奧同球隊職員有備而來，佢先同時代廣場門口個紅彗星、渣古模型合照，之後就直上電器店，可惜佢到達嘅時間尚早，好多店舖都未開門。行多個圈之後，卒之等到開門，迪肯尼奧先去咗adidas買咗兩對波鞋，之後再幫襯三星買咗兩部同款但唔同色嘅手機，短短時間已經使咗過萬蚊。
領隊自嘲唔出名
不過，迪肯尼奧仍意猶未盡，去咗Gucci兜個圈，後來佢睇中咗一款勞力士，對統稱做綠玻璃、售價6萬元嘅手錶好有興趣，佢話遲啲再嚟過買，臨走佢連高達模型都唔放過，走去影多張合照。行街時都有唔少球迷認得佢攞簽名，佢都好樂意照簽，最搞笑係有商店職員問佢係咪好出名？迪肯尼奧就話：「唔係，我哋唔出名！」前後買咗兩個鐘，一班球員原車返回酒店。
採訪、攝影：鄧永賢
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第三集足本放送中！速上：
http://hk.apple.nextmedia.com/livestream/channel/talk24