無綫嘅藝員版「超級巨星」《星夢傳奇》播咗幾集,是非多,回響大,經常成為娛樂版頭條。聽聞,股評人界都有兩位出晒名嘅「咪霸」,就係郭思治(郭sir)同黃德几(Dickie),兩人噚日互笠高帽,話對方先係業界歌神。
郭思治 愛唱老歌
股評人不時要返大陸睇廠考察,完成工作,聚埋一齊嘅消閒活動,少不免就係唱K。有人好似胡孟青咁,一首起、兩首止,而郭sir同Dickie兩位唱得之人,當然就唔客氣做咪霸啦。
郭sir好謙虛咁話,自己唱歌只係「五個音唱準四個咁啫」,要畀分只得51分,啱啱合格,平日都係唱譚詠麟、張學友八十年代嘅hit歌,又大讚Dickie唱得最好。兩人曾經合唱張學友首《李香蘭》,仲係飲歌嚟㗎。
堪稱「多倫多黎明」嘅Dickie,曾經喺1996年參加全球華人歌唱大賽,唔客氣認叻,話今年喺香港股評人協會晚宴上扮PSY跳唱《江南style》,連財經事務及庫務局局長陳家強都拍爛手掌。對於唱歌,「如果我認第二,就一定係郭sir第一啦!」
鄧聲興 講好過唱
佢話,平日多數約埋鄧聲興唱K,對方唱成點?佢話鄧聲興都係講股好過唱歌喎。
查實大家聽股評人講股就聽得多,唱歌就未聽過,如果搞個股評人版歌唱大賽,又有冇話題性呢?
李華華
mailto:[email protected]
倪匡、蔡瀾同肥佬黎約埋一齊《亂噏24》,你睇咗未?
唔睇冇話題,第二集足本放送中!速上:
http://hk.apple.nextmedia.com/livestream/channel/talk24