梁思浩主持嘅有線靈異節目《怪談》，之前話要同過身多年嘅「俏黃蓉」翁美玲搞冥婚，結果俾翁美玲舊愛湯鎮業鬧爆，搞到人神共憤。前晚思浩同岑寶兒（阿夢）仲有三個稱為怪談BB嘅𡃁模喺尖沙嘴搞宣傳，思浩扮成紙紮公仔，阿夢就着裙褂扮新娘，一睇就知又搞冥婚，唔通唔怕又俾人鬧？思浩話：「唔係搵藝人，𠵱家係幫觀眾搞，收到好多要求。」
思浩扮到入晒戲，仲指住啲怪談BB話想飲紙紮奶，阿夢就擺出驚樣。思浩話：「當日話搞係製作部度嘅，我做主持梗係無限支持，但見到咁大迴響，呢8年嚟我第一次同監製講唔好，因為黃日華同我講叫我唔好做，做咗令大家唔開心，好彩公司最後答應。」湯鎮業叫黃日華出口阻止？思浩話唔知，佢本身唔識湯鎮業。
爆司徒法正被追債
思浩仲爆料：「噚日喺數碼電台收工，有幾個馬來西亞人搵我，個樣唔友善似追債，問我識唔識某師傅，但我同嗰個人合作完冇聯絡。」係咪司徒法正？梁思浩第一時間答：「係。」 噚日問番身在台灣嘅司徒法正，佢喺電話度話：「我錢銀冇問題，佢（梁思浩）咁爆出嚟真奇怪，搞到我尷尬。」
撰文：馮仁昭
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24