中環置地廣場間高檔超市ThreeSixty今年初結業，中環人食晏，少咗個地方買靚飯盒，不過唔使愁，聽聞識飲識食嘅娛樂大亨林建岳，租咗ThreeSixty部份位置，準備開兩間中高檔粵菜同意大利菜餐廳，仲會相當重視外賣生意，打算提供精緻飯盒。
港島廳中價版
岳少近年開咗幾間知名高級食肆，意大利餐廳8 1/2 Otto e Mezzo Bombana長期爆滿係人都知，中菜館亦有幾間，包括港島廳、九龍廳同潮廳，位於中環皇九嘅港島廳更係唔少企業高層嘅中午飯堂。基本上，一講係岳少開嘅餐廳，已經知道質素同收費都係高水平。
聽聞，岳少計劃喺置地新開兩間餐廳，可能係Bombana同港島廳嘅中價版，亦會着重精緻嘅外賣生意，即係都唔會平㗎喇。雖然置地間ThreeSixty早於2月結業，但岳少本月先至收舖，開始裝修，估計最快都要3至4個月後先開張大吉，等等啦。
【動主播召喚 敢你就來】
立即報名： http://anchor.nextmedia.com