滙豐公佈7月中國製造業PMI初值為47.4，再創11個月新低，A股一度插水近2%，但同時間港股卻非常硬淨，最多只係跌116點，尾市仲倒升收場，連帶A股跌幅亦收窄至僅0.5%。點解咁堅？好大程度同總理李克強嘅「保七」言論有關，7%成為增長底線，再差嘅經濟數據，只會換來更大嘅救市憧憬，繼續以中資股作為出擊對象準沒錯。
如果戰友唔想煩，諗炒乜板塊，買入手持一籃子中資股嘅惠理集團（806）就係最好不過的選擇。惠理由有金手指之稱嘅謝清海創辦，旗艦惠理價值基金A，今年以來微跌2.2%，但絕對係非戰之罪，事關期內A股及H指分別跌8%及15%，更彰顯惠理嘅揀股功力。
根據SDI資料，惠理今年重揸藥股如四環（460）、上海醫藥（2607）及復星醫藥（2196），全線跑贏大市，睇好中資股大翻身，惠理槓桿效應幫到你。
惠理噚日收報4.37元，升3.80%，與250日線4.38元近在咫尺，由熊轉牛味道極濃，日線圖更升破5月以來嘅下降軌，一旦大市再爆一浸，惠理見5字頭絕對唔難。
唐牛
【動主播召喚 敢你就來】
立即報名： http://anchor.nextmedia.com