【大坑】葉童同老公陳國熹為慶祝25周年銀婚紀念，前晚9點幾喺大坑嘅隱泉串燒包場狂歡，兩公婆着情侶粗口tee「F××K」恩愛現身，好友張學友、梁朝偉、曾志偉、陳可辛同老婆吳君如、沈嘉偉同老婆邱淑貞、劉偉強、上山詩鈉、周汶錡同呂方等畀面到賀，場面墟冚到爆。
撲向椅背遮面
大家都飲到不醉無歸，直至凌晨12點幾陸續走人，梁朝偉離去時仲保持清醒，但目光有啲呆滯，至於曾志偉前晚冇去向劉家良致祭，反而去咗派對戥葉童兩公婆高興，仲飲到要人扶佢上車。
戴cap帽嘅學友上車後，竟然一反常態咁即刻烏低身趴前，雙手捉實椅背遮面，似足犯人坐囚車咁唔想俾人影到個樣，可惜佢被由面到頸都紅卜卜嘅醉態出賣咗！葉童兩公婆壓軸離去，葉童上車後仲興奮豎手指公，陳國熹前晚亦喺微博上載跟好友合照，多謝大家祝福。
「唔會飲太多」
另外，學友噚日喺大埔接受鳳凰URadio主持陳海琪訪問，學友話：「派對梗係會飲酒，我冇醉到，飲咗酒梗係面紅，唔想被影到樣先遮面，我唔會飲太多，否則今日嚟唔到呢個節目。」學友仲話志偉前晚落機就趕去派對，噚日朝早就出席劉家良出殯儀式，所以志偉嚟到派對就瞓覺。問學友有冇諗過搞結婚派對？佢話：「唔會，最多食吓飯，大搞咁麻煩。」至於郭富城話想搵三大天王拍戲，學友話城城未搵佢，等佢睇咗劇本先，問到介唔介意襯托城城？學友大方話：「冇關係，最緊要角色啱。」
採訪、攝影：朱志聰、李志明、魯萍
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24