早兩星期小弟介紹嘅卡姆丹克（712）有晒交代，兩個禮拜升咗35%。新鮮滾熱辣，又有新政策！
噚日內地媒體報道，分佈式光伏應用示範區電量補貼標準，已經確定為每千瓦時0.42元（人民幣．下同），對下游光伏股最有利，除咗卡姆丹克外，下游另一領導者就係興業太陽能（750，下稱興能）。既然卡姆丹克已破頂，興能都有權問鼎今年3月10.31港元個頂，現價追入有着數！
阿爺撐光伏 貼足20年
其實，早喺今年3月，發改委曾出台《關於完善光伏發電價格政策通知》徵求意見稿，將分佈式發電自發自用電價補貼定為0.35元，但𠵱家調升到去0.42元，幅度講緊係兩成，可想而知，中央幾咁撐光伏業。據內地報章訪問廈門大學中國能源經濟研究中心主任林伯強指，之前0.35元嘅補貼，啲企業係可以勉強保本，不過𠵱家0.42元就肯定保障到合理收益，提高企業參與分佈式光伏發電嘅積極性。
短線嚟講，估計興能可以炒呢單補貼價消息，不過長線嚟講應該仲有排升！因為上個禮拜頭，國務院發表嘅促進光伏產業健康發展意見，首次講明光伏補貼年限達20年。
記住，係20年！仲有，同時設立入行門檻。照咁睇，呢鋪阿爺真係撐光伏業撐得好行。
講番隻興能，佢就專事光伏工程，可直接受惠於國策補貼，透過長達20年嘅補貼期刺激更多定單量，尤其過去兩年喺光伏股業績大波動期間，興能都可以交出穩定成績，實在難得，舊年興業收入按年升28.7%至31億元，毛利率微升0.1個百分點至24.2%，純利增長13%至3.3億元，每股盈利0.521元，仍可派末期息7港仙，多派75%，實在誠意可嘉。
業務穩定 新單滾滾來
今年首季，興能再錄新增定單金額為4.93億元，涵蓋範圍包括傳統幕牆工程、高端幕牆材料及綠色建築業務，以此推斷，全年營業額可再有三成以上增幅。
而上周三又再成功定下9,000萬美元融資協議，顯示投資仍積極，以迎接未來巨大市場商機。
興能舊年光伏建築一體化營業額則增29.8%至10.72億元，年內參與咗38個光伏建築一體化業務項目，喺舊年5月，集團已獲年內第一批「金太陽示範工程」下150兆瓦項目同太陽能屋頂工程嘅其中16兆瓦項目，所以未來爭取新單應有優勢。
以走勢衡量，近期興能再顯行業王者之風範，上周二高造9.6港元後回落打底，整固咗成個幾星期，現水平都應該係時候上車，如破到10.31港元個頂，相信升勢會連綿不絕。
陳承龍
本欄逢周四刊登
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24