喺電影《古惑仔》入面，大飛哥話：「呢隻雀出幾多，我出多一蚊！」估唔到阿仙奴領雲格都大飛哥上身，咁玩嘢畀多1鎊（約11.9港元），合共出價40,000,001鎊斟利物浦前鋒蘇亞雷斯。
啱啱過4千萬鎊「知會價」
阿仙奴先後出3,500萬鎊同埋4,000萬鎊收購阿蘇，但都俾利物浦拒絕。前晚兵工廠領隊雲格加碼，不過佢唔係攞多1,000萬鎊、100萬鎊或10萬鎊，而係1鎊，合共出價40,000,001鎊第3次斟阿蘇。聽講阿蘇同紅軍份約有條咁嘅例，就係如果有球會出超過4,000萬鎊，紅軍可以唔接受，但係就要一定正式通知佢，而據報佢亦想同阿仙奴傾吓。
英國傳媒認為，雲格咁玩嘢出多1鎊，係想話畀阿蘇聽，佢哋好想將佢帶去阿聯酋球場；換言之，即係逼阿蘇正式向利物浦提出離隊要求。據了解，兵工廠答應畀阿蘇一份周薪15萬鎊嘅5年合約，比𠵱家喺紅軍嘅12萬鎊周薪多兩成半，仲有歐聯踢，所以阿仙奴對阿蘇真係好吸引。
阿蘇助攻「勝」2:0
雲格亦想畀個訊息利物浦，就係除咗佢哋之外，唔會有球會肯用逾4,000萬鎊買阿蘇。皇家馬德里無疑對阿蘇好有興趣，但據報唔會出過多2,500萬鎊，唔怪得雲格突然大飛哥上身，用1鎊嚟同利物浦打呢場轉會戰啦！據聞，紅軍會喺踢完對墨爾本勝利場熱身賽後，坐低同阿蘇慢慢傾。
至於噚日對勝利場季前熱身賽，阿蘇做後備，直到72分鐘先落場，亦係自4月21日後，首次替利物浦比賽。最終紅軍憑隊長謝拉特上半場嘅入波，加埋前鋒伊亞高艾斯巴斯喺補時埋齋，以2:0擊敗主隊勝利；而伊亞高艾斯巴斯入嗰一球，仲係阿蘇助攻畀佢㖭。
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24