男人過咗30歲，有啲嘢都唔係想做就做；好似「籃球之神」米高佐敦（MJ）、湖人巨星拜恩同熱火「閃電俠」獲迪咁，3個中佬各有各煩惱。不過，最大鑊嘅係MJ，因為佢嘅問題要開刀先解決到！
結得婚嘅有邊個唔想生小朋友？米高佐敦4月同耶維蒂結婚，耶維蒂想同籃球之神生個BB，所以就同MJ講不如生番個。但係個問題係現年50歲嘅MJ喺第一段婚姻完結時，就做咗結紮手術，所以要生都有難度。好在𠵱家醫學昌明，紮咗咪「通」番佢囉；再加上MJ咁錫老婆，所以日前盛傳MJ會做手術重新接駁輸精管，咁就可以生BB啦。話明係傳聞，信不信由你啦。
拜恩玩嘢亂報喜
另一邊廂，成日被拎嚟同MJ比較嘅拜恩，因為日前喺instagram上載咗張同老婆雲妮莎遊巴黎嘅相，仲留言暗示拜恩嫂有第3胎，令到球迷紛紛送上祝福。不過，拜恩之後喺自己twitter講，其實雲妮莎仲未有身孕：「係咪得我一個見到『第3個BB』後面有個問號？多謝大家祝賀，不過我兩公婆仲考慮緊生唔生。」34歲嘅拜恩要考慮唔係冇道理嘅，始終人過咗30歲，做咩都會多一層考慮，係要諗清諗楚先可以做。
獲迪畀3,000萬「掩口費」
同兩位殿堂級前輩唔一樣，獲迪嘅問題唔關小朋友事，其實煩住佢嘅唔只係日益嚴重嘅傷患，仲有佢前妻法齊絲！話說佢同前妻因為錢銀同見兩個小朋友嘅問題打官司，日前獲迪終於同前妻達成協議，將會畀500萬美元（約3,800萬港元）後者，算係冇拖冇欠，唔怕前妻再數臭佢。至於獲迪前妻可唔可以再見兩個仔，就要睇法院之後點判。
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange