【灣仔君悅酒店】前熱刺法國球星、現年46歲嘅真路拿，今次以英超亞洲賽大使身份嚟到香港，佢表現親民，難得係佢雖然退役冇踢波，但身形依然保持得非常之好，不過唯一唔好就係經常煙不離手。
睇雜誌曬太陽
噚日上午9點幾，呢位靚佬球星戴住墨鏡、攞住杯飲品煙不離手，同一位女子去到佢入住嘅灣仔君悅酒店11樓嘅泳池。不過一身長褲、polo恤嘅真路拿似乎志不在游水，佢先喺門口同另一位外籍男子寒暄咗五分鐘之後，同位女士去咗泳池邊坐低，食咗兩支煙就上番房。不過上番去唔夠半個鐘，真路拿再次落到嚟泳池，今次佢換晒短褲T恤，唯一唔變嘅係依然煙不離手。
真路拿先去攞咗條毛巾，然後揀咗張有太陽照射到嘅沙灘椅坐低。佢坐低後即脫去上衣，露出一身肌肉，年過40身形依然保養得宜。佢落水游咗10幾分鐘之後，就上番水繼續食煙同睇雜誌，享受咗大概半個鐘嘅日光浴之後就上番房。
豎起拇指示好
到下晝11點幾，真路拿跟大隊出發，佢早一步落到樓下見到有記者在場守候，佢即報以微笑非常友善，之後就點起手中香煙吊癮。佢以極速扯完支煙後，竟然將煙頭掉喺地上，並用熟練嘅「腳法」踩熄支煙，不過可能佢唔知已經觸犯法例，隨時被罰1,500蚊，事後佢仲舉起拇指示好。
採訪、攝影：陳辰、楊浩賢、鄧永賢
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！