無綫新劇《飛虎Ⅱ》一直拍得幾順利，點知前兩日發生兩宗意外，其中羅仲謙（謙仔）見紅入院縫針，鍾嘉欣場爆炸戲就突然提早爆，好在佢同馬德鐘都冇受傷。
前日（22日）上晝7點幾，謙仔喺將軍澳電視廣播城錄影廠，拍攝一場講佢推手推車入𨋢跣低開槍嘅戲份，點知跣落地坐正喺未掃清嘅一粒強化玻璃碎度，割到謙仔屁股開花見紅，左邊屁股近大髀位置流晒血，保安即時幫佢止血兼送佢入院！由於謙仔屁股受傷，等醫生時全程企喺度。照咗X光後，粒玻璃碎仲喺度，醫生即刻幫佢攞番出嚟，再縫咗兩針。不過謙仔好專業，噚日繼續開工，佢話拍戲難免有意外，暫時拍住文戲先：「最尷尬係喺醫院縫針時，要喺女護士面前露半邊屁股啫！」
「嚇到嗌住救命走」
至於嘉欣BB嗰場就有驚無險，場戲講佢身邊兩呎幾外有手榴彈爆炸，原本夾好時間爆佢就狂奔，點知炸彈突然提早爆，好在爆炸力有限，嘉欣BB花容絲毫無損：「原本我爆炸時好有型咁走，點知提早爆，嚇到我嗌住救命走！」嘉欣BB話當時喺佢側面爆，但冇諗過毁容：「我只係諗唔好受傷，因為我仲要拍劇同開演唱會！」特別係下月要開演唱會，嘉欣BB話開工都會打醒十二分精神，唔可以畀自己有任何損傷。而馬德鐘老婆就喺微博呻，話擔心老公仔拍劇整親喎！
版主：陳基征
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！