兩個禮拜前，孫柏文話過同個股票前輩食飯。嗰日除咗傾香港高球會件事之外，亦提到佢見到香港啲old money家族，自82至84年中英聯合聲明，同六四至92年南巡外，第三次因擔心香港政治及政策前途，拋售港資產，降低在港資產比重。不出十日，就傳出和黃（013）想賣百佳，我會覺得佢哋係撤資。
用零食包圍超市
多唔使講，由最低工資、反競爭法、特別印花稅，甚至嚟緊嘅最高工時，全部都會似鏹水咁，令香港經濟腐爛。不過嗰啲私募基金同大陸儍仔國企睇唔到，佢哋仲buy香港乜最自由經濟係會直到永遠，excel裏個「永遠自由經濟價」估值冇計工聯會、李卓仁等話事，更冇睇壹仔嗰篇《事實與偏見》中，連黎智英都話普選李卓仁做特首，恒指即跌四成。我只可以話，其他贏得嘅政客贏都會一樣咁跌。有政客會反對所有公屋戶年年免租一年咩？有，不過輸硬。
仲有，之前幾年因大陸放水幾十萬億元，唔少流落香港，當中亦有流去百佳，所以對上五年盤數係特別靚。揸住對上五年嘅數，買家又出個「香港會永遠自由經濟價」畀和黃，仲唔賣？不過我感安慰嘅，咁多權貴家族賣嘢，令我有合理懷疑連李澤鉅、old money都信2017真係普選。恭喜晒！
最後，百佳賣盤有個冇人講嘅理由，就係有對手CEC國際（759）旗下啲759阿信屋店。百佳、惠康各在港有230幾間分店，759店由四年前嘅幾間到有超過150間。佢哋學1949年前嘅中共，零食包圍超市，我今年初股價六毫時叫過大家一注獨贏CEC，目標價1.3元。佢哋禮拜五出業績，靚就即見目標價，下個禮拜再講CEC。
孫柏文
獨立股評人
http://facebook.com/shuen
本欄逢周二刊出
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange