見到陳茂波呢種人，就會替梁錦松不值，也替楊永強不值，當日梁錦松所謂利益衝突偷步買車，對比今日陳茂波有計劃部署地去將經營劏房及擁有東北土地利益隱藏，梁之誠信問題不過係小巫見大巫。至於楊永強因沙士苦主一句「厚顏無恥」而請辭下台，以今日梁振英政府展示之政治道德標準而言，應評為風高亮節，加以表揚。「厚顏無恥」四字，可以令仍然對自己人格有要求的人下台，但對梁粉班子而言，並不適用。就如幾個月前張震遠，若非涉及商罪科刑事調查，恐怕今日每個星期仍大模廝樣坐在政總行會會議室，翻閱官員呈上之機密文件。
推卸責任 將老婆擺上枱
陳茂波認為東北土地利益已轉讓予太太家族就不存在利益問題，以佢會計師「算精」專業訓練，點會唔一早做足工夫，亦因為佢識部署，呢種人嘅機心至恐怖。大家大妨重溫上次劏房事件，佢將責任推到老婆許步明身上，當中正正是透過海外離岸註冊的公司Orient Express Holdings Inc.持有劏房。當時陳茂波亦以個人沒有持有有關物業權益為由，將責任推得一乾二淨。
到底陳茂波曾否持有Orient Express Holdings股權，股權何時易手到許步明手上？關鍵的Orient Express Holdings為離岸註冊公司，只有陳茂波本人主動交代才能釋除公眾疑慮，但他拒絕披露，一味死拖，靠保皇黨頂住立法會調查，以為拖延就過到骨，佢民望至低，拖累整個政府，上司林鄭、梁振英又包庇，冇要求陳茂波公開交代Orient Express Holdings詳情。按常理推測政客誠信好比貞操，若公開有關資料能證明自己清白，以佢算精之人，又點會唔主動公開，死拖就一定有嘢。
今次農地事件又係同樣手法，佢聲稱去年10月許步明已將有關土地之股權轉讓，又係得把口而冇實質證據，在立法會事務委員會上，議員質問佢以乜嘢價錢賣畀乜嘢人，陳茂波又再重施故技，將責任推畀老婆及外家。外家已成為陳茂波利益黑洞，令人懷疑有可能是他出任局長期間暫時充當keeper，為的就是今日可以在立法會上振振有詞去否認利益衝突。
若果今次佢又甩到身，證明現行政治體制實在無法處理陳茂波呢種機關算盡鑽空子，挖空心思隱藏私人利益呢種人。
政府內並非全屬無恥之徒，行政會議、司局長為挽回淪亡之政府公信力及東北發展大計，實在有必要責成陳茂波公開Orient Express Holdings及土地股權轉移之資料，證明自己清白，若拒絕公開，must be something，唯有請他下台，以挽回公眾對政府及東北發展大計的信任。
如果今次佢又過到骨，等如表示梁振英可以包庇陳茂波而隻手遮天，立法會黨派要聯手拉布，拒絕審議政府提交之法案、撥款，直至陳茂波下台為止。
添馬男
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange