今年最強勁板塊，濠賭股絕對有份，至於被視為澳門腹地嘅橫琴，發展潛力亦不可小覷。橫琴概念一早已獲國家主席習近平祝福，總投資額超過3,000億人仔，商機無限，早早喺橫琴插旗嘅麗豐控股（1125），噚日抽高6%，相信只係熱身階段。
岳少林建岳掌舵嘅麗新系，可謂百足咁多爪，麗豐屬其中一家上市旗艦，主攻上海及廣州住宅及商廈項目，去年底宣佈與控股公司豐德麗（571）合作，喺橫琴興建「星藝文創天地」項目，主打文化創意產業如影視、音樂等，總投資額達180億人仔，首期供地約50萬平方米。噚日有傳媒報道，橫琴近期地皮交投異常活躍，地價短短兩周竟大升1.3倍，麗豐當地項目，齋計地皮升值已經好和味。
橫琴概念股如珠江船務（560）及珠海控股（908），今年累積升幅超過八成，反觀麗豐卻跌15%，絕對唔合理，淨係炒換馬概念，已經夠晒憧憬。
睇圖表，麗豐噚日大成交升穿1月以來嘅下降軌，一旦突破250日線0.182元，將可確認由熊轉牛，係咁意用0.4倍PB作目標，股價可見0.25元，潛在升幅近五成，屆時仍較珠船及珠控折讓逾半。
唐牛
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange