今年佳士得春季拍賣會，共拍得32億港元巨款，焦點之一是明朝周臣《長江萬里圖》，不消五分鐘便由500萬元底價狂升至4,500萬元成交，還未計算佳士得向買家收取近14%佣金，即630萬元。
單是佣金已夠小巿民買入兩個住宅單位，高價背後，一個鎮得住場面的拍賣師不可或缺。當了四年拍賣師的郭心怡（Elaine）透露提價心得，就是別放過任何競投者，就像張藝謀電影，一個都不能少。 記者：譚淑美 攝影：鄧振權
拍賣會上，螢光幕顯示《長江萬里圖》，富商名流交頭接耳，代理人低頭打電話向老闆請示。Elaine站在莊嚴的木壇上喊道：「500萬……750萬……」價錢轉眼去到1,000萬元，旋即以每口價100萬元接力跳，直至4,500萬元，無人再出更高價，她那雙鷹眼環顧場內一周道：「4,500萬……有冇人再出高價？最後機會……」扑槌喊道：「Sold！」全場鼓掌。
釘實競投者 推高成交價
Elaine總結提價經驗，說：「最重要係唔好太容易放過嗰啲underbidders，即係買唔到但又參與競投過程嘅人，因為買家只有一個，但要拍出高價錢，你需要好多underbidders，咁樣先拍得好、拍得精彩。」
受訓年半，深知怎樣令價錢節節上升，「我哋嘅訓練係，一收到一個價，就即刻望返去競爭者度，譬如有人出100萬，咁我就要即刻望向出95萬嘅人，望實佢，問佢要唔要，如果佢接受，又望返之前個競爭者，總之唔好太容易放過佢哋，所以我要記住邊幾個出緊價。有時佢哋會等到最後先出多一口」。場外還有書面投標者，她要記住的人及價錢，實在太多了吧？
記者採訪的那場書畫拍賣會，客人約400名，價位一個上落可高達100萬元，一旦搞錯，辳爆事小，得失客仔事大。像電視台主播，她的前方設置電子顯示牌，減低出錯機會，還有左右護法提水，「其實係團隊工作，坐喺我隔籬嗰兩個工作人員幫我好多，有時我嗌錯，價位走咗少少，佢哋會細聲提醒。有時我睇唔到競投嘅人坐喺邊，同事會提下我：『喺後排、右手邊……』」除了身旁兩位同事，場內亦有數名同事睇場。
對白不能千篇一律，所以她會說「穿外套嘅男士」正在跟「戴眼鏡呢位」競爭。她解釋除了增加氣氛，最重要是區分誰在競投。「咁多人，呢一口價係邊個拍到呢？如果拍賣師唔夠清晰，客人可能以為自己競投到，但其實係另一位客人投得，所以有時我會話呢個唔係你嘅。呢點要好清晰」。
新聞報道主播通常有出鏡費，那拍賣師有沒有上台費？「我想呀……雖然冇額外收入，但對我嘅履歷有幫助」，賣得好價，可以分享公司的豐厚佣金嗎？「冇㗎，冇㗎！我想呀，哈哈！」
合格率低 十個篩剩一個
佳士得在香港每年只有兩場大型拍賣會，像其他大部份拍賣師一樣，她不是全職當拍賣師，而是統籌公司轄下的藝術課程。拍賣師由內部員工晉升，合格率高嗎？「冇一個官方百分比，我嗰時有10個同事一齊受訓練，只有我一個做拍賣師」。她成為合資格拍賣師後，獲贈木槌一個，但長期握着槌柄敲枱會手痛，於是她索性脫了手柄，只拿着槌頭敲枱。
這天的《長江萬里圖》，是她任職拍賣師以來成交價最高的一幅拍品，回想四年前被公司派去倫敦拍賣所初試啼聲，拍賣只值數百英鎊的平民珠寶，每叫一口價只提升20鎊，即是200多港元。「第一場拍賣會，只有30至50人，我淨係識講序號，Lot no.1、Lot no.2……同埋價錢，真係好驚。而家我熟啲，可以介紹下呢幅係Yoshitomo Nara（日本藝術家奈良美智）嘅乜嘢作品」。
你想爆?幫你爆!
熱線電話：2990 7225
mailto:[email protected]
WhatsApp：9131 4511
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange