哥迪奧拿前日首次打拜仁慕尼黑有啲競賽意義嘅比賽，就大勝漢堡4:0，而且佢一手簽番嚟嘅堤亞高艾簡達拿（艾簡）仲表現得鬼咁搶鏡。本來好值得高興至係，但佢以前條𡃁維蘭路華因要抗癌而辭去巴塞隆拿主帥個位，搞到佢心情勁低落。
上季贏咗德甲、德盃同埋歐聯3料冠軍嘅拜仁，前日喺保路西亞公園球場，同多蒙特、漢堡同埋主隊慕遜加柏，進行德國電訊盃。4強戰佢哋鬥漢堡，話晒對手有韋斯達文同埋雲達華治等好手撐場，所以哥迪奧拿亦好認真咁排出強陣；其中新加盟嘅艾簡仲踢防中，同卻奧斯及列貝利等喺中場合作，支援打單箭頭嘅文迪蘇傑。
艾簡處子秀搶鏡
艾簡雖然只係打咗48分鐘，但全場瞻前顧後，表現十分搶鏡。講番場波，拜仁憑謝路美保定、文迪蘇傑同卻奧斯各建一功，半場就領先漢堡3:0；換邊後佢哋再由後備上陣嘅湯馬士梅拿入多粒，最終大勝4:0，成功展示3冠王嘅王者本色，哥迪奧拿呢位前巴塞主帥賽後就話：「我哋打得好好，順利打入決賽。我亦非常滿意己隊嘅表現。」同日另一場4強戰，慕遜加柏憑達姆斯入致勝球，小勝多蒙特1:0。
拜仁贏得咁輕鬆，哥迪奧拿應該笑到四萬咁口至係，但之前跟佢搵食嘅巴塞教練維蘭路華因抗癌而喺上周五辭職，搞到佢好唔開心，哥迪奧拿話：「佢係我老死，我真係非常難過。希望佢同埋佢屋企人都可以堅強起來，面對艱難時刻。」
傳馬天奴接掌巴塞
維蘭路華辭職後，巴塞帥位懸空，但飛燕諾教練朗奴高文同埋史雲斯領隊勞特立都表明唔去魯營教波，家陣有傳巴塞會搵阿根廷教練馬天奴（Gerardo Martino）。點解巴塞會搵個咁九唔搭八嘅人嚟頂維蘭路華？原因好簡單，之唔係佢係美斯老竇嘅偶像囉！另外，維蘭路華寫咗公開信畀球迷，感謝佢哋嘅支持。我求大俠都祝福佢早日戰勝癌魔，返球場同球迷見面啦！
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange